Andri: Þetta var fáránlegt, ég var rólegur allan tímann

Andri Marteinsson var sáttur maður í kvöld eftir sigur sinna manna á Blikum. Þjálfarinn hrósar liði sínu í hástert.

"Við erum búnir að vera inni í fullt af leikjum í sumar en þetta hefur ekki alltaf verið að detta fyrir okkur. En ég hef alltaf sagt að hver er sinnar gæfu smiður og ef strákarnir hefðu spilað í 90 mínútur í fleiri leikjum eins og þeir gerðu í dag þá værum við í allt annarri stöðu."

"Þetta er eiginlega alveg fáránlegt, ég var rólegur allan leikinn. Það var ekkert stress eða hræðsla í okkur. Þetta er öryggi sem ég skynja hjá strákunum. Ég tek undir það að strákarnir voru tilbúnir frá upphafi."

"Við lögðum upp með ákveðna taktík, að loka á miðjuna og Alfreð og sækja upp kantana. Það voru allir að sinna sínu og það skilaði því að við vorum betri og áttum sigurinn skilinn," sagði þjálfarinn.