Flugumferð færist í eðlilegt horf

Flugumferð um spænska flugstjórnarsvæðið er smám saman að færast í eðlilegt horf eftir að spænskir flugumferðarstjórar sneru aftur til vinnu í gær. Þeir tóku sér allir veikindaleyfi á fimmtudag til að mótmæla vinnuálagi. Í gær gripu spænsk stjórnvöld til neyðaraðgerða og hótuðu að kæra alla þá sem ekki myndu mæta til vinnu.

Um 250-300 þúsund manns voru strandaglópar á flugvöllum á Spáni þegar aðgerðir flugumferðarstjóra náðu hámarki. Spænsk stjórnvöld áætla að flugumferð verði komin aftur í eðlilegt horf eftir tæpa tvo sólarhringa.