Umfjöllun: Jafntefli kom Val á toppinn

Stjarnan og Valur skildu jöfn, 1-1, í skemmtilegum leik á Stjörnuvelli í kvöld. Úrslitin verða að teljast nokkuð sanngjörn enda var jafnræði með liðunum og sköpuðu þau sér fjölda færa í fjörugum leik.

Valsmenn byrjuðu leikinn betur og fengu góð nokkur góð færi í upphafi leiks. Besta færið fékk Daninn Danni König á 16. mínútu þegar hann fékk boltann, einn og óvaldaður í vítateig Stjörnunnar. Bjarni Þórður Halldórsson, góður markvörður Stjörnunnar, sá hins vegar við honum með góðri markvörslu.

Tíu mínútum seinna voru heimamenn komnir yfir og var það að verki Ellert Hreinsson eftir laglegan undirbúning frá Steinþóri Frey Þorsteinssyni. Ellert fékk boltann inn í vítateig Valsmanna, lék á Reyni Leósson, og kom boltanum framhjá Kjartani Sturlusyni í marki Vals. Markið skildi liðin af í hálfleik.

Valsmenn mættu ferskir inn í síðari hálfleik og á 52. mínútu voru þeir búnir að jafna leikinn. Þar var á ferðinni varamaðurinn Rúnar Már Sigurjónsson sem kom inná í hálfleik. Hann skallaði boltann í fjærhornið eftir ágæta sókn. Arnar Sveinn Geirsson gaf sendingu inn í teig sem Ian Jeffs skallaði áfram, beint á kollinn á Rúnari sem þar með jafnaði leikinn.

Eftir jöfnunarmarkið datt leikurinn niður og fátt markvert gerðist þar til undir lok leiksins.

Í einni sókn hefði sigurinn getað dottið báðum megin. Fyrst vildu Stjörnumenn fá vítaspyrnu þegar Steinþór Freyr var felldur innan vítateigs en ekkert dæmt. Upp úr þessu fengu Valsmenn hættulega skyndisókn sem endaði með því að Köning slapp einn í gegnum vörn Stjörnunnar.

Bjarni Þórður varði hins vegar glæsilega í markinu og bjargaði stigi fyrir sína menn. Jafntefli varð niðurstaðan í ágætum leik.

Með sigrinum komust Valsmenn á topp Pepsi-deildarinnar með 15 stig og verða á toppnum a.m.k. þar til umferðin klárast á morgun. Stjarnan siglir nokkuð lygnan sjó um miðja deild og eru með tíu stig.

Stjarnan - Valur

1-0 Ellert Hreinsson (25.)

1-1 Rúnar Már Sigurjónsson (52.)

Áhorfendur: 724

Dómari: Valgeir Valgeirsson 6

Tölfræði:

Skot (á mark): 9-9 (4-6)

Varin skot: Bjarni 4 - Kjartan 3

Horn: 3-4

Aukaspyrnur fengnar: 18-13

Rangstöður: 2-2

Stjarnan: 4-5-1

Bjarni Þórður Halldórsson 6

Baldvin Sturluson 5

(78. Bjarki Páll Eysteinsson -)

Tryggvi Sveinn Bjarnason 6

Daníel Laxdal 6

Hilmar Þór Hilmarsson 5

Dennis Danry 5

Ellert Hreinsson 6

Jóhann Laxdal 6

Steinþór Freyr Þorsteinsson 7

(89. Atli Jóhannsson - )

Halldór Orri Björnsson 5

Þorvaldur Árnason 6

(83. Ólafur Karl Finsen -)

Valur 4-5-1

Kjartan Sturluson 6

Greg Ross 6

Reynir Leósson 6

Atli Sveinn Þórarinsson 5

Martin Melgaard Pedersen 6

(79. Stefán Jóhann Eggertsson -)

Sigurbjörn Hreiðarsson 6

Haukur Páll Sigurðsson 5

(45. Rúnar Már Sigurjónsson 7)

Ian Jeffs 7 - Maður leiksins

Guðmundur Steinn Hafsteinsson 6

(68. Þórir Guðjónsson 5)

Arnar Sveinn Geirsson 6

Dannig König 5