Bjarni Þórður aftur í Fylki

Bjarni Þórður Halldórsson, sem varið hefur mark Stjörnunnar undanfarin þrjú tímabil, er aftur genginn í raðir Fylkis.

Þetta kemur fram á Fótbolti.net í kvöld. Samningur Bjarna við Stjörnuna rann út á dögunum og því var honum frjálst að semja við Fylkismenn.

Bjarni, sem er 27 ára gamall, er uppalinn Fylkismaður en fór frá félaginu árið 2008 og gekk þá til liðs við Stjörnuna. Hann lék einnig sem lánsmaður hjá Víkingi sumarið 2007.

Alls á hann að baki 90 leiki í efstu deild, þar af 64 með Stjörnunni. Hann lék einnig átta sinnum með U-21 landsliði Íslands.