Sævar Þór: Þetta var snerting

Sævar Þór Gíslason, fyrirliði Selfoss, segir að það hafi verið réttur dómur að reka Bjarna Þórð Halldórsson, markvörð Stjörnunnar, af velli í kvöld.

Sævar Þór slapp inn fyrir vörn Stjörnunnar þegar staðan var 2-1 fyrir gestina úr Garðabæ og fékk víti þegar Bjarni Þórður virtist brjóta á honum. Bjarni fékk rautt en mótmælti dómnum kröftuglega.

„Þetta var snerting, það var alveg klárt. Ég steig inn í hann og það kom snerting," sagði Sævar við Vísi eftir leikinn. Guðmundur Þórarinsson skoraði úr vítinu og var niðurstaðan 2-2 jafntefli.

„Ég er ánægður með stigina miðað við hvernig leikurinn var. Stjarnan var betri í fyrri hálfleik og bróðurpart síðari hálfleiks. Það er því gott að sótt þetta stig."

„Við ætluðum ekki að tapa mörgum leikjum á heimavelli en úr því sem komið var var gott að hafa náð að koma til baka gegn öflugu og hröðu Stjörnuliði."