Víða ófært

Vegna veðurs verður reynt að halda leiðinni frá Borgarnesi að Hvalfjarðargöngum og á Akranes opinni til klukkan 21:30. Eftir það er ekki tali öruggt að vera á ferðin á þessum slóðum. Ófært er nú orðið á nokkrum stöðum á landinu. Meðal annars á Mýrdalssandi og Reynisfjalli við Vík í Mýrdal, einnig er ófært á Siglufjarðarvegi, um Þröskulda og í Reykjólasveit. Þetta kemur fram í tilkynningu frá Vegagerðinni.

Snjóþekja og snjókoma er á Reykjanesbraut og raunar á öllu suðvesturhorninu. Þæfingsfærð og skafrenningur er á Mosfellsheiði.

Á Suðurlandi eru hálkublettir og éljagangur á Sandskeiði, Hellisheiði og í Þrengslum. Á öðrum leiðum eru hálkublettir, éljagangur og sumstaðar snjóþekja.

Þæfingsfærð er á Vesturlandi og skafrenningur undir Hafnarfjalli að Hvalfjarðargöngum og í uppsveitum Borgarfjarðar. Hálkublettir og skafrenningur er svo í Borgarfirði, á Holtavörðuheiði og á Snæfellsnesi.

Á Vestfjörðum er hálka, hálkublettir, éljagangur eða skafrenningur á flestum leiðum. Þungfært og stórhríð er á Steingrímsfjarðarheiði og á Ströndum og þar er ekki ferðaveður. Ófært er um Þröskulda og í Reykhólasveit. Þæfingsfærð er frá Kollafirði að Þorskafirði.

Á Norðurlandi vestra er ófært á Siglufjarðarvegi. Hálka og skafrenningur er Þverárfjalli og í Langadal. Í Skagafirði eru hálkublettir og éljagangur. Á Öxnadalsheiði er skafrenningur og snjóþekja. Norðaustanlands er éljagangur og hálka í öllum Eyjafirðinum og á Víkurskarði. Éljagangur og snjóþekja er svo við Mývatn en hálka ásamt einhverjum skafrenning er á flestum öðrum leiðum.

Á Austurlandi eru hálkublettir á Möðrudalsöræfum og snjóþekja á Vopnafjarðarheiði. Snjóþekja er mjög víða eins og til að mynda á Fjarðarheiði og á Vatnsskarði eystra. Hálka er þó á Fagradal og í Oddskarði en svo eru hálkublettir frá Fáskrúðsfirði að Höfn.

Suðaustanlands er snjóþekja eða hálkublettir ásamt einhverjum éljagangi. Ófært er þó orðið á Mýrdalssandi og á Reynisfjalli.