Ábyrgð ASÍ mikil

„ASÍ hefur komist að því að óvissan um lyktir Icesave málsins hafi nú þegar seinkað efnahagsbatanum að minnsta kosti um hálft ár," segir Björn Valur Gíslason, þingmaður VG og varaformaður fjárlaganefndar. „Þessi staðreynd er reyndar flestum ljós, jafnt þeim sem vilja leiða það mál til lykta sem og hinna staðið hafa í vegi fyrir lausn Icesave deilunnar," segir þingmaðurinn í pistli á heimasíðu sinni.

Alþýðusamband Íslands gaf í dag út endurskoðaða hagspá fyrir árin 2010 til 2012. Samdráttur verður meiri en í fyrstu var gert ráð fyrir og botni kreppunnar verður ekki náð fyrr en í byrjun næsta árs. Óvissan um lyktir Icesave málsins hefur þannig seinkað efnahagsbatanum að minnsta kosti um hálft ár.

Atvinnuleysi mun einnig aukast um tvö prósentustig og ná hámarki á næsta ári. Um 3.500 Íslendingar munu bætast í hóp atvinnulausra á næstu tólf mánuðum samkvæmt hagspá ASÍ.

Björn Valur segir að það veki undrun hvers vegna forysta ASÍ hafi ekki beitt sér af fullri hörku fyrir lausn Icesave deilunnar í stað þess að sitja hjá. „Þeirra ábyrgð hlýtur að vera mikil," segir þingmaðurinn.