Icesave deilan hefur frestað efnahagsbatanum um hálft ár

Um 3.500 Íslendingar munu bætast í hóp atvinnulausra á næstu tólf mánuðum samkvæmt hagspá Alþýðusambandsins. Icesave deilan hefur frestað efnahagsbatanum um að minnsta kosti um hálft ár.

Alþýðusambandið gaf í dag út endurskoðaða hagspá fyrir árin 2010 til 2012. Samdráttur verður meiri en í fyrstu var gert ráð fyrir og botni kreppunnar verður ekki náð fyrr en í byrjun næsta árs.

Óvissan um lyktir Icesave málsins hefur þannig seinkað efnahagsbatanum að minnsta kosti um hálft ár. Atvinnuleysi mun einnig aukast um tvö prósentustig og ná hámarki á næsta ári.

„En á bak við þessi tvö prósentustig erum við að tala um 3.500 manns þannig að þetta er verulega mikið áhyggjuefni og mikilvægt að allt sé gert til að koma í veg fyrir það að þessi spá gangi eftir," segir Ólafur Darri Andrason, hagfræðingur ASÍ.

Í fyrri hagspá Alþýðusambandsins var gert ráð fyrir því að stóriðjuframkvæmdir myndu hefjast á þessu ári. Allt bendir hins vegar til þess að þær frestist fram á næsta ár sem þýðir að samdrátturinn verður meiri í ár.

„Þannig að það má kannski segja að þessi spá sem við vorum að kynna hér í dag að hún er fyrst og fremst að sýna dekkri mynd á þessu ári og kannski ekki eins miklar breytingar á árunum 2011 og 2012," segir Ólafur Darri.

Í ályktun sem miðstjórn ASÍ sendi frá sér í dag er kallað eftir tafarlausum aðgerðum ríkisstjórnarinnar í vega- og stóriðjuframkvæmdum .

„Ég held að þetta tvennt geti skipt sköpum í því að hrinda fram meiri umsvifum í atvinnulífinu og kannski þá líka að atvinnulífið fylgi eftir að vera þá þróttmeiri í eigin ákvörðunum. Í augnablikinu í þeirri óvissu sem er er þetta allt að koðna niður og það er að slokkna á öllu," segir Gylfi Arnbjörnsson, forseti ASÍ.