Wilshere handtekinn eftir slagsmál um helgina

Jack Wilshere leikmaður Arsenal, einn efnilegasti leikmaður Englands, var um tíu klukkustundir í fangaklefa eftir að slagsmál brutust út fyrir utan næturklúbb um síðustu helgi.

21. árs kona endaði með brotinn olnboga eftir slagsmálin en sparkað var ítrekað í hana meðan hún lá á jörðinni. Unnusti hennar fékk einnig að finna fyrir því með þungum höggum í andlit.

Wilshere er aðeins átján ára og lék sinn fyrsta landsleik fyrr í þessum mánuði gegn Ungverjalandi. Hann var úti að skemmta sér með þremur vinum sínum þegar vandræðin hófust.

Lögreglan stöðvaði leigubíl sem var á leið frá vettvangi og handtók Wilshere ásamt vinum hans. Þeir voru grunaðir um þessa líkamsárás. Tekin voru fingraför og DNA-sýni ásamt því að myndir frá öryggismyndavélum verða skoðaðar.

Talsmaður Wilshere staðfestir að leikmaðurinn hafi verið handtekinn en segir að hann hafi ekki átt þátt í slagsmálunum heldur reynt að stilla til friðar.

„Hann er mikilvægt vitni en hann reyndi að róa menn niður. Ólíklegt er að hann fái einhverjar ákærur. Jack er tilbúinn að vinna með lögreglunni að rannsókn málsins," sagði talsmaðurinn í samtali við The Sun.