Bóndakona í Skagafirði sá líka dularfulla ljósið

„Ég sá þessi ljós í gærkvöldi," segir bóndakona á fimmtugsaldri sem Vísir ræddi við fyrr í dag en hún segist hafa séð sömu ljós og Finnur Andrésson myndaði í Árbænum í gærkvöldi.

Bóndakonan var í bíl í Lýtingsstaðarhreppi í Skagafirði rétt fyrir klukkan sjö í gærkvöldi þegar hún segist hafa séð ljósið tvívegis.

„Ég sá bara blikk og svo aftur blikk," segir bóndakonan sem var með eiginmanni sínum að keyra heim á leið.

„Ég hélt fyrst að þetta væri eitthvað endurvarp frá bílrúðunni sjálfri þannig ég lagði höndina á rúðuna, þá sá ég blikkið aftur," segir konan sem segir ljósið hafa verið með hinu undarlegasta móti.

Aðspurð hvort hún væri viss um að þetta væru ekki ljós úr flugvél sagði konan að hún væri fullviss.

„Það er mikil flugumferð hér yfir og maður sér ljósin vel í myrkrinu. Ég þekki muninn á framljósum flugvéla, vængljósum og ljósunum á búknum - þetta var ekki í líkingu við það enda sennilega tífalt stærra ljós eins og ég sá það," segir bóndakonan sem bætir við að hún hafi meira að það segja einu sinni séð gervihnött brenna upp í andrúmsloftinu:

„Það var mikil upplifun. Þá kom grænt langt ljós og úr varð talsvert sjónarspil. Þetta var ekki neitt í líkingu við það," segir hún.

Bóndakonan segist ekki hafa velt ljósinu fyrir sér fyrr en hún sá myndband Finns á Vísi.

„Þá sá ég að þetta voru svipuð ljós. Hinsvegar virðist ljósið vera blátt á myndbandinu en ljósið sem ég sá var hvítt," segir bóndakonan skagfirska sem segir ljósið þó hafa hagað sér með svipuðum hætti þar sem hún sá það.

Hún segir ljósið hafa verið í suðvestri og því virtist það vera yfir hálendinu.

„Ég tek samt fram að ég hef enga trú á því að þetta hafi verið fljúgandi furðuhlutur. Sennilega er þetta eitthvað fyrirbrigði sem var að fara í gegnum gufuhvolfið," segir bóndakonan sem er fullviss um að það megi finna eðlilegar skýringar á ljósinu þó sýnin hafi vissulega verið furðuleg.

Bóndakonan vildi ekki koma fram undir nafni, „ég get það ekki, þá myndu nágrannarnir ekki hætta að gera grín að mér á næsta þorrablóti," segir hún hlæjandi.