Friðarverðlaunum Nóbels stolið

Óljóst er hvort hægt verður að afhenda friðarverðlaun Nóbels hinn 10. desember næstkomandi. Afhendingarhátíðin mun engu að síður fara fram í ráðhúsinu í Osló. Vandinn er sá að verðlaunahafinn Liu Xiaobo situr í fangelsi í Kína og verður ekki sleppt þaðan í bráð. Eiginkona hans og lögfræðingur fá heldur ekki fararleyfi. Því gæti verið vandasamt að finna einhvern til þess að taka á móti verðlaununum.

Norðmenn vilja fara að öllu með gát við að finna staðgengil því sporin hræða. Árið 1935 voru verðlaunin veitt þýska friðarsinnanum Carl von Ossietzky. Hann sat þá í fangelsi fyrir njósnir og föðurlandssvik. Sök hans var að hafa birt upplýsingar um meint brot Þjóðverja á Versalasamningnum. Þar var greint frá uppbyggingu flughersins sem síðar varð Luftwaffe og því að herflugmenn væru þjálfaðir í Sovétríkjunum.

Þess má geta að árið 1990 reyndi dóttir Ossietzkys að fá dóminum um föðurlandssvik hans og njósnir hnekkt. Árið 1992 staðfesti hinsvegar hæstiréttur Þýskalands dóminn. Sá dómur er endanlegur.