Koeman hefur áhuga á að stýra Villa

Hollendingurinn Ronald Koeman segist hafa áhuga á því að gerast knattspyrnustjóri Aston Villa.

Koeman er fyrrum leikmaður hollenska landsliðsins og hefur á ferlinum þjálfað Ajax, Benfica og Valencia.

Martin O'Neill hætti óvænt með Aston Villa í síðasta mánuði og á félagið enn eftir að ráða eftirmann hans. Ólíklegt er talið að Kevin MacDonald, núverandi stjóri, fái fastráðningu í starfinu.

Koeman segir að félagið hafi haft samband við umboðsmann hans fyrir um viku síðan.

„Ég hef auðvitað áhuga á að hlusta á alla. Enska úrvalsdeildin er mjög sterk og ég hef áhuga á að starfa í henni," sagði hann.

„Það var haft samband við umboðsmanninn minn fyrir um viku síðan en meira veit ég ekki um málið. Ef þeir hafa áhuga munu þeir hafa samband."