Úrsagnir álíka margar og 1996

Haukur Ingibergsson, forstjóri Þjóðskrár, segir að svipaður fjöldi fólks hafi skráð sig úr þjóðkirkjunni að undanförnu líkt og árið 1996. Það ár skráðu um 1% allra þeirra sem þá voru skráðir í þjóðkirkjuna sig úr kirkjunni eftir að nokkrar konur stigu fram og sögðu Ólaf Skúlason, þáverandi biskup, hafa beitt sig kynferðisofbeldi.

Undanfarna daga og vikur hefur gustað um þjóðkirkjuna þar á meðal vegna Ólafs Skúlasonar. Fjölmargir hafa lagt leið sína á skrifstofu Þjóðskrár Íslands til að skrá sig úr Þjóðkirkjunni en nákvæmar tölur um það liggja ekki fyrir.

„Við ætlum að taka þær saman eftir þessi mánaðamót og birta þær um miðja næsta viku. Það er alveg ljóst að það er töluverður fjöldi tilkynninga um breytingu á trúfélagi," sagði Haukur í þættinum Reykjavík síðdegis á Bylgjunni í dag.

Þá sagði Haukur: „Mér skilst á þeim sem voru í Þjóðskránni að þetta sé kannski ekkert ósvipuð viðbrögð og voru fyrir 15 árum."

Hægt er að hlusta á viðtalið hér.