Andri Fannar til Vals

Andri Fannar Stefánsson er genginn til liðs við Val en kemur frá KA á Akureyri. Hann er nítján ára gamall og þykir efnilegur miðvallarleikmaður. Hann gerði þriggja ára samning við Val.

Þetta er ekki eini leikmaðurinn sem hefur samið við Valsmenn síðan að Kristján Guðmundsson tók við þjálfarastarfinu. Fyrir skemmstu fékk liðið Guðjón Pétur Lýðsson úr Haukum og Halldór Kristinn Halldórsson sem lék áður með Leikni.

„Ég er mjög ánægður með að vera kominn hingað" segir Andri Fannar við heimasíðu Vals. „Það eru flottir og metnaðarfullir hlutir í gangi hjá Val. Ég er mjög hrifinn af því sem Kristján og Freyr leggja upp með og hlakka til að byrja að vinna með þeim. Aðstaðan er frábær og allt til staðar til að halda áfram að bæta sig og eiga góð ár hérna."