Villa ætlar ekki að bjóða MacDonald starfið til frambúðar

Aston Villa hyggst ekki bjóða Kevin MacDonald að taka við knattspyrnustjórn liðsins til frambúðar. MacDonald hefur stýrt liðinu síðan  Martin O'Neill sagði upp störfum þann 9. ágúst.

Villa hefur gefið út að félagið ætli að ráða stjóra með reynslu úr úrvalsdeildinni en MacDonald verði við stjórnvölinn þangað til. Undir stjórn MacDonald hefur Villa unnið tvo af þremur deildarleikjum sínum.

Bandaríkjamaðurinn Bob Bradley hefur verið orðaður við starfið en hans vonir hafa minnkað eftir yfirlýsingu Villa enda býr hann ekki yfir reynslu úr deildinni. Ronald Koeman, fyrrum þjálfari Ajax, hefur einnig verið orðaður við starfið.

„Við munum nú hefja viðræður við þá menn sem við teljum að uppfylli okkar skilyrði til að geta orðið knattspyrnustjóri Aston Villa. Vonandi mun niðurstaða fást sem fyrst," segir í yfirlýsingu frá Villa.