Flest tilfelli af HIV í 25 ár

Fjöldi tilfella nýrra HIV-greininga hefur ekki verið meiri hér á landi síðan 1985. Á síðasta ári greindust þrettán tilfelli, en árið 1985 voru þau sextán. Mælingar hófust fyrst árið 1983 og var þá einn einstaklingur sem greindist með HIV-veiruna. Kemur þetta fram í skýrslu Landlæknisembættisins.

„Þetta er svipuð þróun og hefur verið í nágrannalöndunum,“ segir Svavar G. Jónsson, varaformaður samtakanna HIV Ísland. „Það vantar sárlega aukna fræðslu og umræðu um sjúkdóminn hér á landi.“

Svavar telur vaxandi kæruleysi varðandi sjúkdóminn sökum þeirra öflugu lyfja sem komin eru á markað áhyggjuefni.

„HIV-jákvætt fólk lifir með þessum lyfjum,“ segir hann. „En þetta er ekki eins og að skera sig á fingri – það er engin lækning.“

Svavar segir árlegan lyfjakostnað eins HIV-sjúklings velta á milljónum króna. „Hann er gríðarlega mikill. Það er hægt að kosta fræðslu- og áróður í heilt ár fyrir lyfjakostnað eins einstaklings,“ segir hann. Einnig sé mikilvægt fyrir almenning að átta sig á því að HIV er orðinn almennur sjúkdómur um heim allan og ekki bundinn við samkynhneigða.

Álfheiður Ingadóttir heilbrigðisráðherra segist ekki hafa séð tölurnar frá Landlæknisembættinu en nauðsynlegt sé að skoða upplýsingarnar í tengslum við mannfjölda og þá lýðfræðilegu dreifingu hópa sem greinast. Hún segir umræðuna í samfélaginu eflaust aldrei nægilega og mikilvægt sé að horfa til nágrannalandanna í tengslum við efnið.

„Löndin í kringum okkur eru að endurskoða blóðgjafir samkynhneigðra karlmanna sem voru stöðvaðar á sínum tíma vegna umræðu um HIV. Það er eitthvað sem við verðum að skoða hér,“ segir Álfheiður.

Árið 1985 var einn gagnkynhneigður einstaklingur greindur með HIV og tveir fíkniefnaneytendur. Hinir þrettán sem greindust það ár voru samkynhneigðir. Árið 2009 voru fimm fíkniefnaneytendur sem greindust og sjö gagnkynhneigðir. Enginn samkynhneigður fékk HIV-greiningu það ár. sunna@frettabladid.is