Stígamót þurftu að loka á sex stöðum á landsbyggðinni

Konur á landsbyggðinni hafa minni möguleika á að leita sér aðstoðar vegna ofbeldis í nánum samböndum en konur á höfuðborgarsvæðinu. Fjárhagur þeirra félaga sem aðstoða konur sem eru beittar ofbeldi er af mjög skornum skammti og fer minnkandi.

Þetta kemur fram í skýrslu sem Guðrún Helga Sederholm vann fyrir félags- og tryggingamálaráðuneytið. Skýrslan ber heitið „Rannsókn á ofbeldi gegn konum. Þjónusta 11 félagasamtaka" og er vinnsla hennar þáttur í aðgerðaáætlun stjórnvalda gegn ofbeldi karla gegn konum í nánum samböndum.

Búist við lokun á Ísafirði

Aðeins eitt kvennaathvarf er á landinu og er það í höfuðborginni. Ekkert athvarf er á landsbyggðinni. Stígamót þurftu að hætta starfsemi á sex stöðum úti á landi vegna fjárskorts á síðasta ári. Aflið á Akureyri þjónustar nærbyggðirnar og Sólstafir á Ísafirði standa frammi fyrir lokun þar sem engu fé hefur verið veitt til starfseminnar á árinu. Kvennaráðgjöfin hefur aðsetur í höfuðborginni. Þjónustumiðstöð Miðborgar- og Hlíða hefur þjónustað erlendar konur sérstaklega.

Samtökin eru fæst á fjárlögum. Fjármagn fá þau helst frá félagsmálaráðuneyti, sveitarfélögum og með frjálsum framlögum. Styrkbeiðnir á ýmsa aðila og fyrirtæki eru liður í fjáröflum flestra samtakanna. Gjafir berast sumum en stopult þannig að fjármögnunin er óútreiknanleg frá ári til árs.

Dregur úr framlögum



Í dag er staðan sú að dregið hefur verulega úr framlögum til flestra félagasamtakanna. Þau þurfa mismikið fé eins og Kvennaráðgjöfin sem þarf lítið fjármagn miðað við Kvennaathvarfið. Stígamót eru á fjárlögum ríkisins og er fjárframlagið ákveðið á hverju ári. Síðastliðin sex ár hefur Stígamót verið með þjónustusamning við Reykjavíkurborg og sú upphæð verið hin sama ár hvert þannig að raunlækkun hefur verið mikil.

Guðrún Helga kynnti niðurstöðu rannsóknar sinnar á opnum fundi í Iðnó í dag. Þar hélt Ingólfur V. Gíslason einnig erindi um rannsókn sína á viðbrögðum heilbrigðisþjónustunnar við ofbeldi gegn konum.