Arnar Már Björgvinsson til liðs við Íslandsmeistara Breiðabliks

Sóknarmaðurinn Arnar Már Björgvinsson er hættur hjá Stjörnunni og búinn að gera þriggja ára samning við Íslandsmeistara Breiðabliks. Þetta kemur fram á vefsíðunni fótbolti.net en Arnar Már er fyrsti leikmaðurinn sem Blikarnir fá til sín fyrir titilvörninni í Pepsi-deild karla næsta sumar.

„Eftir sex góð ár í Garðabænum þá hef ég ákveðið að róa á önnur mið, en ákvörðuninn á sér nokkuð langan aðdraganda," sagði Arnar Már við Fótbolta.net en hann skoraði 2 mörk í 11 leikjum í Pepsi-deild karla í sumar eftir að hafa skorað 9 mörk í 15 leikjum tímabilið á undan.

Arnar Már er tvítugur og er því á sama aldri og flestir leikmanna Blika. Hann er væntanlega hugsaður til að fylla í skarðið sem markakóngurinn Alfreð Finnbogason skilur eftir sig.