Umfjöllun: Fyrsti sigur Vals gegn stigalausum Grindvíkingum

Valur vann sinn fyrsta leik á keppnistímabilinu með góðum útisigri gegn Grindavík í kvöld, 1-2. Þar með náðu Valmenn að hífa sig upp töfluna í Pepsi-deildinni en Grindvíkingar sitja sem fastast stigalausir á botninum.

Valsmenn byrjuðu leikinn mun betur í kvöld og voru mun líklegri til að skora fyrsta markið undan þéttum vindi. Bæði lið voru óörugg í sínum aðgerðum og segja má að liðin hafi slegið upp keppni í slæmum sendingum á tímabili, slík var frammistaða leikmanna í upphafi leiks.

Fyrsta alvöru færið leit ekki dagsins ljós fyrr en á 38. mínútu þegar Rúnar Már Sigurjónsson prjónaði sig í gegnum vörn Grindvíkinga. Skot hans úr úrvalsfæri var hins vegar afleit og fór framhjá. Staðan var því markalaus í hálfleik.

Seinni hálfleikur var líflegri og komust Valsmenn yfir á 58. mínútu með marki Danni König. Grindvíkingar færðu Valmönnum markið á silfurfati enda fékk Baldur Aðalsteinsson frið til að gefa boltann fyrir markið þar sem Köning var einn á auðum sjó og gat ekki annað en skorað.

Grindvíkingar gáfust ekki upp og jöfnuðu með góðu marki Gilles Mbang Ondo eftir góðan undirbúning Grétars Hjartasonar, sem var að leika sinn fyrsta leik í byrjunarliði Grindavíkur í langan tíma. Ondo skoraði þar með fyrsta mark Grindavíkur á þessari leiktíð og léttist brúnin á mörgum stuðningsmönnum liðsins í stúkunni.

Það gekk hins vegar fátt upp hjá Grindvíkingum og strax í næstu sókn kom Jón Vilhelm Ákason Valsmönnum aftur yfir sem reyndist vera sigurmark leiksins. Sigurbjörn Hreiðarsson átti góða fyrirgjöf af hægri kantinum og Jón Vilhem skallaði boltann lagalega í markið. Setja má hins vegar spurningarmerki við varnarvinnu Grindvíkinga.

Heimamenn voru óheppnir að jafna ekki leikinn undir lokinn þegar Scott Ramsey átti skot í stöngina. Það gengur fátt upp hjá Grindvíkingum þessa dagana og lokatölur urðu 1-2 fyrir Val.

Gilles Mbang Ondo hættulegastur í liði Grindvíkinga og Scott Ramsey minnti á sig í leiknum með skemmtilegum tilþrifum. Það er hins vegar ljóst að varnarleikurinn er þeirra helsti andstæðingur um þessar mundir.

Danni König var skeinuhættur í liði Vals og gaf varnarmönnum Grindavíkur sjaldan frið. Þetta var ekki besti leikur Valsmanna í sumar en gefur þeim engu að síður þrjú stig og eru nú komnir með fimm stig í 8. sæti deildarinnar.



Grindavík - Valur 1-2

0-1 Danni König (57.)

1-1 Gilles Mbang Ondo (69.)

1-2 Jón Vilhelm Ákason (70)

Áhorfendur: 680

Dómari: Gunnar Jarl Jónsson 6

Skot (á mark): 9-11 (5-4)

Varin skot: Rúnar 3 - Kjartan 3

Hornspyrnur: 5-7

Aukaspyrnur fengnar: 17-16

Rangstöður: 1-1



Grindavík (4-3-3)

Rúnar Dór Daníelsson 5

Loic Daniel Mbang Ondo 4

(82. Ray Anthony Jónsson -)

Auðun Helgason 4

Marko Valdimar Stefánsson 4

Jósef Kristinn Jósefsson 5

(25. Alexander Magnússon 6)

Orri Freyr Hjaltalín 4

Jóhann Helgason 4

Matthías Örn Friðriksson 5

Scott Mckenna Ramsay 6

Grétar Ólafur Hjartarsson 5

(75. Óli Baldur Bjarnason 5)

Gilles Daniel Mbang Ondo 6

Valur (4-5-1)

Kjartan Sturluson 5

Stefán Eggertsson 6

Reynir Leósson 5

(46. Sigurbjörn Örn Hreiðarsson 6)

Atli Sveinn Þórarinsson 5

Greg Ross 5

Martin Pedersen 5

Baldur Ingimar Aðalsteinsson 6

(75. Matthías Guðmundsson 5)

Jón Vilhelm Ákason 6

(82. Jón Vilhelm Ákason -)

Rúnar Már Sigurjónsson 5

Arnar Sveinn Geirsson 6

Danni König 7 Maður leiksins