Konchesky var á Anfield í gær

Vinstri bakvörðurinn Paul Konchesky verður orðinn leikmaður Liverpool áður en félagaskiptaglugginn lokar. Roy Hodgson, stjóri Liverpool, ætlar að kaupa leikmanninn frá Fulham.

Hluti af samningnum er að Lauri Dalla Valle, sóknarmaður varaliðs Liverpool, fari til Fulham.

„Það eru nokkur smáatriði sem á eftir að ganga frá," sagði Hodgson eftir að Liverpool vann WBA 1-0 í gær. Konchesky var á meðal áhorfenda á leiknum.

Konchesky er 29 ára en hann hefur verið hjá Fulham síðan júlí 2007 þegar hann kom frá West Ham. Þar áður var hann í herbúðum Charlton.

Fyrir helgi keypti Fulham vinstri bakvörðinn Carlos Salcido frá PSV Eindhoven til að fylla upp í skarðið sem Konchesky skilur eftir sig.