Orri framlengir og Helgi ráðinn aðstoðarþjálfari

Það er nóg að gera hjá Grindvíkingum við að undirbúa liðið fyrir næsta sumar. Félagið hefur nú ráðið Helga Bogason sem aðstoðarþjálfara Ólafs Arnar Bjarnasonar og svo er Orri Freyr Hjaltalín búinn að framlengja við félagið til ársins 2014.

Helgi hefur þjálfað lið Njarðvíkur síðustu ár og hann verður nú hægri hönd Ólafs Arnar eftir því sem segir á heimasíðu Grindavíkur.

Samkvæmt sömu frétt verður Milan Stefán Jankovic einnig aðstoðarþjálfari meistaraflokks og hann er því væntanlega vinstri hönd Ólafs Arnar. Milan mun einnig sinna afreksþjálfun 2. flokks karla og mun koma að tækniþjálfun hjá félaginu.

Óli Baldur Bjarnason hefur svo framlengt við félagið til næstu fjögurra ára.