Þvottavélaþjófur játar

Karlmaður á þrítugsaldri hefur viðurkennt að hafa stolið þvottavél úr sameign fjölbýlishúss á höfuðborgarsvæðinu nýverið. Fram kemur í á vef lögreglunnar að fleiri slík mál séu til rannsóknar.

Í síðustu viku fannst illa fengin þvottavél í bifreið sem var stöðvuð í borginni. Í því tilviki var hægt að koma vélinni aftur í réttar hendur en hætt er við að einhverjar séu seldar á verði sem er of gott til að vera satt, að mati lögreglu. Vegna þessa hvetur lögreglan fólk til að hafa samband ef það verður vart við óeðlileg tilboð.

Einnig bendir lögregla á mikilvægi þess að tryggja að óboðnir gestir eigi ekki greiða leið inn í hús, hvort heldur er um að ræða sameign eða aðrar vistarverur.