Búast við að Assange gefi sig fram

Þess er vænst að Julian Assange, stofnandi WikiLeaks, gefi sig fram á næstunni. Lögmenn Assange hafa sagt að hann muni ræða við lögreglumenn vegna handtökuskipunar sem sænsk yfirvöld hafa gefið út á hendur honum vegna ásakana um kynferðisbrot. Þeir hafa þó ekkert látið uppi um það opinberlega hvenær Assange muni ræða við lögregluna.

Fram kemur á fréttavef Guardian að Assange hefur fullyrt við félaga sína á undanförnum dögum að hann telji að handtökuskipunin sem sænsk yfirvöld hafa gefið út á hendur honum sé runnin undan rifjum Bandaríkjamanna.

WikiLeaks uppljóstrunarsíðan hefur að undanförnu birt þúsundir skjala með viðkvæmum upplýsingum sem utanríkisráðuneyti Bandaríkjanna hefur fengið sent frá sendiráðum sínum viða um heim.