Eggert Magnússon vill kaupa Sheffield Wednesday

Enska slúðurblaðið Daily Mirror segir í dag að Eggert Magnússon sé í viðræðum um að kaupa Sheffield Wednesday.

Félagið er mjög illa statt fjárhagslega og segir Mirror að Eggert leiði hóp fjárfesta sem vill bjarga félaginu.

Miðvikudagsfélagið hefur ekki staðfest fregnirnar en það skuldar um 26 milljónir punda. Kaupverðið er þó aðeins fimm milljónir punda.

Þrjú ár eru síðan Eggert var rekinn frá West Ham eftir misheppnaðan tíma hjá félaginu.

Félagið er fallið niður í þriðju efstu deild en það á dygga stuðningsmenn og til að mynda mættu 23 þúsund manns á heimaleik félagsins um síðustu helgi. Það spilar á Hillsborough vellinum sem tekur um 40 þúsund manns í sæti.

Um fornfrægt félag er að ræða en ljóst er að það þarf á hjálp að halda. Mirror segir að Eggert sé maðurinn sem ætli að bjarga félaginu og reisa það við á ný.

Howard Wilkinson er stjórnarformaður félagsins en Alan Irvine stýrir liðinu.

Wednesday er þriðja elsta félag Enalnds en það var stofnað 4. september árið 1867.

Með liðinu leika menn á borð við Nicky Weaver, Darren Purse og Neil Mellor.