Óður hrafn drepinn á Akranesi

Árásargjarn hrafn réðst á barn og hund á Akranesi í gær. Hann var aflífaður í viðurvist lögreglumanna eftir árásina, segir á fréttavefnum Skessuhorni.

„Við bendum fólki á að vara sig á hröfnum sem flýja ekki undan mannfólkinu. Þessi var einstaklega árásargjarn," segir húsmóðir í samtali við Skessuhorn. Hún var ein heima með barn sitt þegar lætin hófust. Heimilisfaðirinn var kallaður heim og síðan var haft samband við Náttúrufræðistofnun sem veitti leyfi til þess að Hrafninn yrði aflífaður.

Húsmóðirin segir í samtali við Skessuhorn að hrafninn hafi sest á pall við heimili fjölskyldunnar. Dóttir hennar hafi verið úti með hundinn, sem er þriggja mánaða hvolpur. Hrafninn hafi staðið á pallveggnum og mænt á þau. Þegar stelpan hafi beygt sig niður til að ná í spýtu fyrir hundinn, sem var hálfpartinn undir henni, hafi hrafninn ráðist á hana og reynt að grípa í bakið á henni.

„Barnið varð skelfingu lostið, öskraði og hljóp inn með hundinn á eftir sér. Ef ég hefði ekki náð að loka hurðinni þá hefði hrafninn komið inn á eftir þeim. Þetta kvikindi hékk svo gargandi á pallinum heillengi og þvílík vonska í honum," segir konan í samtali við Skessuhorn.