Hlaut þyngri dóm fyrir að berja Guðmund í Byrginu

Hæstiréttur hefur dæmt Ragnar Hauksson í fjögurra mánaða skilorðsbundið fangelsi fyrir að hafa ráðist á Guðmund Jónsson, fyrrverandi forstöðumann Byrgisins, eignaspjöll á bifreið Guðmundar, húsbrot og hótanir. Hæstiréttur komst að þeirri niðurstöðu að hann hefði ekki klæmst við 17 ára stúlku.

Héraðsdómur Suðurlands dæmdi Ragnar í 30 daga skilorðsbundið fangelsi fyrir brotin í desember á síðasta ári. Honum var jafnframt gert að greiða stúlkunni 100 þúsund krónur í miskabætur en hann var dæmdur fyrir að hafa viðhaft kynferðisleg og ósiðleg ummæli við stúlkuna sem hann húðflúraði á stofu sinni í mars 2008. Í samtali við Vísi í desember sagðist Ragnar vera hissa á dómnum. Hann áfrýjaði dómnum til Hæstaréttar sem kvað upp sinn úrskurð í dag.

Ragnar er eiginmaður einnar þeirra konu sem kærðu Guðmund í Byrginu fyrir kynferðisbrot. Hann sagði fyrir rétti að hann hefði séð svart eftir að hann las dóm yfir Guðmundi sem féll árið 2008. Þar var Guðmundur dæmdur í þriggja ára fangelsi fyrir kynferðisbrot gegn konum sem voru í Byrginu. Ragnar játaði fyrir Héraðsdómi Suðurlands að hafa veist að Guðmundi og hrint honum á jörðina.

Í viðtali á Stöð 2 í maí 2008 sagðist Ragnar hafa hitt Guðmund fyrir tilviljun. „Vinur minn bauð mér að koma með sér í sumarbústað til þess að slaka á. En hver heldur þú að renni í hlað í næsta húsi? Guðmundur Jónsson! Ég snappaði bara," sagði Ragnar. „Ég gekk greiðlega að honum og sló hann með handarbakinu og lófanum þvert og yfir moldarbeðið. Það var bara trúin og edrúmennskan sem hindraði mig í að ganga lengra. Hefði ég hitt á hann fyrir 10 árum hefði ég drepið hann. Ég hefði framið morð á honum," sagði Ragnar sem sá ekki eftir neinu.