Varðskipið ólaskað eftir jarðskjálftann

Georg Lárusson, forstjóri Landhelgisgæslunnar, segir að svo virðist við fyrstu sýn að varðskipið Þór sem nú er í smíðum í borginni Concepsion fyrir Gæsluna hafi sloppið við skemmdir í jarðskjálftanum sem reið yfir Chile í gærmorgun. Skipasmíðastöðin hafi hins vegar verið rústir einar eftir skjálftann.

Tveir íslenskir starfsmenn Landhelgisgæslunnar sem voru staddir í Concepcion við eftirlit á lokafrágangi varðskipsins eru heilir á húfi og við góða heilsu. Þá hefur einnig fengist staðfest að íslensk hjón á vegum Ísfélags Vestmannaeyja hafi sloppið ómeidd undan skjálftanum. Í fréttatilkynningu frá Landhelgisgæslunni segir að Íslendingunum hafi tekist að komast í örstutt símasamband en það hafi verið stopult frá því skjálftinn reið yfir.

Georg segir Gæsluna hafa heyrt frá öðrum þeirra í skamma stund í nótt. „Rétt rúmlega eitt í nótt þá náði annar þeirra símasambandi í 30 sekúndur og gat sagt okkur frá því að þeir væru báðir á lífi. Hótelið sem hann var á stóð skjálftann af sér en samkvæmt lýsingum er þar allt í rúst, algjörlega óíbúðarhæft og hann þurfti að fara annað í skjól."

Landhelgisgæslunni er kunnugt um hvernig ástandið var í íbúð hins mannsins. „Þeir lýsa ástandinu þannig að borgin sé meira og minna rústir einar. Þarna er vatnslaust og rafmagnslaust og þeir vildu bara koma sér sem allra fyrst í burtu frá borginni Concepcion. Ég veit að þeir hafa orðið sér útum bíl og bensín og ætla að freista þess að keyra til Santiago. Við höfum gert ráðstafanir til að reyna fljúga þeim þaðan til Íslands," segir George.

Ekki vitað um 12 Íslendinga

Enn hefur utanríkisráðuneytið ekki heyrt frá 12 Íslendingum og verður haldið áfram að reyna ná í þá í dag. Ráðuneytið var með lista yfir nöfn 38 Íslendinga sem taldir voru í landinu, ýmist búsettir þar eða ferðamenn.