Ekkert heyrst frá 13 Íslendingum

Að minnsta kosti 300 manns hafa látist vegna jarðskjálftans sem skók Chile í gær. Forseti landsins, Michelle Bachelet, sagði í ávarpi í gær að talið væri að skjálftinn hafi haft áhrif á heimili og líf tveggja milljóna Chile búa. Rafmagn, símalínur og vatnsveitur liggja enn niðri á stórum skjálftasvæðum og eyðileggingin er mikil.

En hefur utanríkisráðuneytið ekki heyrt frá 13 Íslendingum og verður haldið áfram að reyna ná í þá í dag. Ráðuneytið var með nöfn yfir 38 Íslendinga sem taldir voru í landinu, ýmist búsettir eða sem ferðamenn.

Tveir íslenskir starfsmenn Landhelgisgæslunnar og íslensk hjón á vegum Ísfélags Vestmanneyja sem öll voru stödd í borginni Concepcion við eftirlit á lokafrágangi varðskips fyrir Íslendinga eru heil á húfi og við góða heilsu. Í fréttatilkynningu frá Gæslunni segir að Íslendingunum hafi tekist að komast í örstutt símasamband en það hafi verið stopult frá því skjálftinn reið yfir.

Fólk er vinsamlegast beðið um að láta ráðuneytið vita ef eitthvað heyrist í þeim í síma 545-9900.

Skjálftinn var 8,8 á Richter og einn sá stærsti í landinu í 50 ár. Viðvaranir voru gefnar út vegna mögulegrar flóðbylgjuhættu í Chile og í nágrannalöndunum í gær. Einhverjar flóðbylgjur hafa riðið yfir en þær eru ekki eins stórar og talið var í fyrstu og hafa ekki valdið miklu tjóni.

Japan er enn í hættu vegna mögulegrar flóðbylgju og hafa þúsundir verið beðnir um að yfirgefa heimili sín. Nýjustu fréttir segja að eins meters há flóðbylgja hafi nú þegar skollið á ströndum Japans.