Ráðamenn ræða áfram við forystumenn erlendra ríkja

Enn fjölgar í hópi þeirra leiðtoga erlendra ríkja sem íslensk stjórnvöld hafa sett sig í samband við eftir að Ólafur Ragnar Grímsson, forseti Íslands, synjaði Icesave lögunum staðfestingar í fyrradag. Íslenskir ráðherrar hafa rætt við 15 erlenda starfsbræður og -systur og veitt vel á þriðja tug viðtala við erlenda fjölmiðla og fréttaveitur.

Auk þess að ræða við David Miliband, utanríkisráðherra Bretlands, í dag hefur Össur Skarphéðinsson, utanríkisráðherra, rætt við Olli Rehn, framkvæmdastjóra stækkunarmála í framkvæmdastjórn, og Vygaudas Usackas, utanríkisráðherra Litháen.

Fram hefur komið að Steingrímur J. Sigfússon, fjármálaráðherra, flaug í dag til Oslóar til viðræðna við fjármála- og utanríkisráðherra Noregs. Hann mun í framhaldinu funda með fjármálaráðherra Danmerkur í Kaupmannahöfn.

Þá tók Gylfi Magnússon, efnahags- og viðskiptaráðherra, fyrr í dag þátt í símafundi íslensk-ameríska viðskiptaráðsins í New York þar sem nokkrir fjölmiðlar tóku þátt og fulltrúar erlendra fyrirtækja.

Yfirlit yfir samskipti ráðamanna við erlenda ráðherra og fjölmiðla í gær og fyrradag er hægt að sjá hér.