Engin viðbrögð frá forsetaembættinu

Enn ríkir fullkomin óvissa um það hvernig Ólafur Ragnar Grímsson, forseti Íslands, mun bregðast við Icesave málinu. Þrír sólarhringar eru liðnir síðan að hann fékk lögin í hendurnar. Þá sagðist hann ætla að taka sér frest til þess að fara yfir málið og í gær tók hann á móti undirskriftum 60 þúsund manna sem skora á hann að synja lögunum staðfestingar.

Örnólfur Thorsson forsetaritari sagði í samtali við fréttastofu Stöðvar 2 og Vísis að hann gæti ekki sagt til um hvenær forsetinn tilkynnti um ákvörðun sína.

Björn Valur Gíslason, varaformaður fjárlaganefndar, sagði í samtali við fréttastofu RÚV að hann teldi að það myndi hafa slæm efnahagsáhrif ef forsetinn myndi draga það til morguns að skýra frá afstöðu sinni.