Auðun verður spilandi aðstoðarþjálfari á Selfossi

Varnarmaðurinn Auðun Helgason fann sér nýtt félag í dag er hann skrifaði undir eins árs samning við 1. deildarlið Selfoss. Ásamt því að spila með liðinu verður Auðun aðstoðarþjálfari en þjálfari liðsins er Logi Ólafsson.

Auðun er á leiðinni inn á Selfoss og mun skrifa undir samninginn klukkan 17.

"Þetta kom upp fyrir tveim vikum síðan. Ég er búinn að hugsa þetta fram og til baka og ákvað að skella mér á Selfoss á endanum," sagði Auðun við Vísi en hann var í viðræðum við þrjú lið og þar af eitt úrvalsdeildarlið.

"Það á að leggja allt í að koma liðinu beint upp aftur. Logi hefur til að mynda tekið með sér styrktarþjálfarann Markus Kislich. Hér er allt fullt af efnilegum strákum og þeir hafa vonandi gott af því að fá einn gamlan með líka," sagði Auðun léttur.

Auðun lék með Grindavík síðasta sumar. Hann átti ár eftir af samningi sínum við félagið en Grindavík ákvað að gera við hann starfslokasamning.