Fjölskylda reisir glæsihótel í Landbroti

Breytingin er mikil á þeim þrjátíu árum sem liðin eru frá því þau Hörður Davíðsson og Salome Ragnarsdóttur hófu að leigja gistiherbergi á bóndabæ sínum í Efri-Vík í Landbroti. Gamla íbúðarhúsið er nú notað sem móttaka fyrir tveggja hæða glæsihótel og margan ferðamanninn rekur í rogastans að sjá þarna í fámennri sveit svo vegleg salarkynni.

Dóttir hjónanna, Eva Björk Harðardóttir, og tengdasonur, Þorsteinn Kristinsson, eru komin með þeim í hótelreksturinn en fjölskyldan hóf uppbygginguna á því að kaupa steypustöð og byggingakrana. Eva Björk segir að fjölskyldan hafi svo fari í steypustígvél og allir sem höfðu einhverja gráðu, vinir, ættingjar og sveitungar, teknir í vinnu, og svo hafi bara verið lagt af stað.

Þarna eru nú veitingasalir fyrir 150 manns og sama fjölda er hægt að taka í gistingu, bæði á hótelinu og í smáhýsum. Spurð hvort þetta sé nokkuð offjárfesting kveður hún svo eigi ekki vera. Þau hafi gert þetta sjálf að miklu leyti og þau muni standa þetta af sér.

Við hótelið eru þau búin að gera golfvöll. Gistiherbergin eru með þægindum eins og baðherbergi og flatskjá. En hvernig gengur svo að fylla þetta allt af gestum? Mjög vel, svarar Eva, og segir sumarið hafa verið yfirfullt. Markmiðið sé hins vegar að stækka enn og byggja upp heilsulind við hótelið í því skyni að fá ferðamenn til að dvelja lengur og utan háannatíma. Hún segir Ísland hafa heilmikið að bjóða ferðamönnum um vetur; það sé ævintýraland.