Efnahagsaðgerðir: Reynt til þrautar að ná samkomulagi

Ríkisstjórnin reynir nú til þrautar að ná samkomulagi um efnahagsaðgerðir sem hægt verði að kynna í dag. Mikil fundahöld hafa verið í stjórnarráðinu í morgun. Nú fyrir hádegi komu fulltrúar opinberra starfsmanna, Alþýðusambandsins og Hagsmunasamtaka heimilanna til fundar við Jóhönnu Sigurðardóttur, forsætisrðaherra, Steingrím J. Sigfússon, fjármálaráðherra, Guðbjart Hannesson, félags- og heilbrigðisráðherra og Árna Pál Árnason, viðskiptaráðherra. Steingrímur sagði í viðtali við fréttastofu seinni partinn í gær að niðurstaða yrði að nást á næstu klukkustundum, helst í dag eða á morgun.

Samkvæmt heimildum fréttastofu ætla forystumenn ríkisstjórnarinnar að kynna fjölþættar aðgerðir til lausnar skuldavanda heimila og fyrirtækja síðar í dag. Þær munu meðal annars kveða á um lækkun greiðslubyrði lána í samvinnu við banka og lífeyrissjóði, hækkun vaxtabóta upp á allt að sex milljarða króna og stofnun félaga utan um auðar íbúðir sem settar verða á leigumarkað. Með stofnun slíkra félaga er vonast til að fasteignaverð hætti að lækka og fasteignamarkaðurinn taki við sér á ný.

Skýrist á næstu klukkustundum

Fjármálaráðherra sagði einnig í samtali við fréttastofu í gær að aðgerðirnar myndu kosta ríkisstjóð töluverðar fjárhæðir og gera þurfa breytingar á því fjárlagafrumvarpi sem nú liggur fyri þinginu, en afgreiðsla þess er eitt af því sem ýtir á að samkomulag náist sem allra fyrst.

Friðrik Ó. Friðriksson, stjórnarformaður Hagsmunasamtaka heimilanna, sagði í samtali við fréttastofu eftir fundinn í morgun að þær aðgerðir sem gripið yrði til nú gætu orðið hluti af enn frekari uppstokkun sem nauðsynleg er til að koma í veg fyrir enn frekari fólksflótta frá landinu. M.a. þyrfti að endurskoða lífeyrissjóðakerfið og fjármögnun þess.

Það skýrist því væntanlega á næstu klukkustundum hvort aðgerðirnar líti dagsins ljós í dag. Við fylgjumst með atburðarrásinni á fréttavefnum visi.is og í kvöldfréttum okkar.