Mancini: Við verðum að nýta færin

Roberto Mancini, knattspyrnustjóri Manchester City, kennir slakri færanýtingu sinna manna um 1-0 tapið fyrir Sunderland í gær.

Emmanuel Adebayor, Yaya Toure og Carlos Tevez fóru allir illa með góð færi áður en Darren Bent tryggði Sunderland stigin þrjú með marki úr vítaspyrnu í uppbótartíma.

Sérstaklega hefur Carlos Tevez sofið illa í nótt en hann misnotaði algjört dauðafæri snemma leiks þegar þrír leikmenn City komust á móti einum varnarmanni Sunderland.

„Fótbolti er mjög furðuleg íþrótt. Við lékum frábærlega í fyrri hálfleik en ef þú nærð ekki að skora þá er hætta á að þú tapir leikjum," sagði Mancini.

„Carlos fékk dauðafæri en þess utan áttum önnur þrjú eða fjögur mjög góð færi til að setja mörk. Þessi úrslit eru mikil vonbrigði því við stefndum á sigur. Í seinni hálfleik vörðum við of aftarlega og þeir náðu að setja pressu á okkur."