Lögum breytt svo ekki þurfi að beita lögregluvaldi

Lögum um fjárnám verður breytt þannig að ekki þurfi að sækja gerðarþola í öllum tilvikum með lögregluvaldi vegna fjárnámsbeiðna sýslumanna. Þetta segir dómsmálaráðherra sem telur aðgerðir með lögregluvaldi oft óþarflega harkalegar.

Í kvöldfréttum Stöðvar tvö í gær var greint frá því að fjögurra barna einstæð móðir var handtekin fyrir utan Kringluna í gærmorgun þar sem hún var að fylgja börnum sínum á Öskudagsgleði. Hún hafði ekki sinnt boðun sýslumanns um fjárnám. Hún neyddist til að skilja börn sín, sjö og tólf ára, eftir, þar sem lögregla flutti hana á brott með valdi.

Ragna Árnadóttir dómsmálaráðherra segir að breytingar á lögum um fjárnám séu í burðarliðnum.

„Það sem þetta nýja frumvarp hefur í för með sér er að það verður hægt að ljúka árangurslausu fjárnámi án þess að til þess þurfi að koma lögregla til að ná í gerðarþola og færa til sýslumanns. Þannig að hægt verður að ljúka þessu að gerðarþola fjarstöddum," segir Ragna

Hún segir lögregluaðgerðir oft óþarflega harkalegar í þessum efnum.

„Það er bara þannig að okkar réttarfar er byggt svona upp að það þarf atbeina lögreglu til að færa til sýslumanns. En þetta er einmitt það sem við erum að leggja til að verði afnumið. Þetta eru óþarflega harkalegt gagnvart gerðarþola sem hefur engar eignir til að benda á, fyrir utan það að þetta eru oft þunglamalegt og dýrt fyrir kerfið að standa í þessu."