Man Utd vill Rodwell fyrir lok gluggans

Enskir fjölmiðlar greina frá því að Manchester United sé nú að leggja allt kapp á að landa Jack Rodwell, hinum unga miðjumanni Everton, áður en félagaskiptaglugganum verður lokað.

Rodwell er nítján ára og getur einnig leikið í hjarta varnarinnar. Honum hefur verið líkt við Rio Ferdinand.

Talið var að United myndi reyna að fá Rodwell eftir tímabilið en á Old Trafford óttast menn að verðmiðinn á leikmanninum muni hækka talsvert í vetur og vilja því krækja í hann fyrir lok gluggans.

Jafnvel er talið að United sé tilbúið að láta Michael Carrick upp í kaupverðið á Rodwell.