Sagna: Þurfum að halda haus

Útlit er fyrir verulega spennandi titilbaráttu á komandi tímabili á Englandi. Bacary Sagna, leikmaður Arsenal, segir ýmislegt sem þurfi að laga frá síðasta tímabili svo liðið geri atlögu að titlinum nú.

„Við höfum mikil gæði í okkar liði og ég get ekki beðið eftir að tímabilið hefjist," sagði Sagna í viðtali.

„Við þurfum að halda haus allt tímabilið og sýna meiri stöðugleika. Í síðasta leik vorum við 3-0 yfir gegn Celtic en unnum á endanum bara með eins marks mun. Einbeitingin verður að vera í lagi."

Sagna hrósar Marouane Chamakh sem kom í frjálsri sölu frá Bordeaux í sumar. Hann skoraði gegn AC Milan á Emirates mótinu um helgina.

„Hann er góður leikmaður, heldur boltanum vel og getur skorað mörk. Það er mjög mikilvægt að hafa leikmann eins og hann við mark andstæðingana," sagði Sagna.