Hvetur almenning til að halda ró sinni

Hundruð þúsunda Frakka mótmæla nú á götum landsins þeirri ákvörðun ríkisstjórnar Nicolasar Sarkozy, Frakklandsforseta, um að hækka lágmarks eftirlaunaaldur í landinu úr 60 árum í 62 ár.

Gríðarlegur halli er á eftirlaunasjóðum Frakka, eða um 5000 milljarðar íslenskra króna og stefnir hallinn í 8000 milljarða árið 2020 verði ekkert að gert. Það er svipuð upphæð og talið er að erlendir kröfuhafar hafi tapað á íslenska efnahagshruninu. Stjórnvöld segja nauðsynlegt að hækka eftirlaunaaldurinn þar sem Frakkar lifi lengur en áður.

Starfsmenn tólf olíuhreinsunarstöðva í Frakklandi ákváðu í gær að ganga til liðs við fjölda annarra starfsstétta sem eru í verkfalli til að mótmæla aðgerðum stjórnvalda. Áhrif þessa gætti strax í gær þegar flæði á eldsneyti til flugvalla í París minnkaði til muna. Talið er að Orly flugvöllur hafi eldsneyti út vikuna en eldsneyti gæti gengið til þurrðar á Charles de Gaulle og Roissy flugvelli undir loka helgarinnar. Þá er elsdneyti ekki dreift á bensínstöðvar og lestarsamgöngur hafa gengið úr skorðum.

Efnahagsráðherrann Christine Lagarde hvetur almenning til að halda ró sinni. Hún segir að eldsneytisbirgðir landsins komi ekki til með þrjóta vegna verkfallsins.