Bradley framlengir við Bandaríkin - Ekki til Villa

Bob Bradley hefur skrifað undir nýjan fjögurra ára samning við bandaríska knattspyrnusambandið um áframhaldandi þjálfun liðsins. Þar með er morgunljóst að hann tekur ekki við Aston Villa.

Bradley kom Bandaríkjunum upp úr riðlakeppni heimsmeistaramótsins í sumar. „Bob er stoltur af því að vera þjálfari Bandaríkjanna, hann er mjög ánægður í starfi," sagði umboðsmaður þjálfarans.

Bradley tók við bandaríska liðinu af Bruce Arena eftir heimsmeistaramótið 2006 en hann hefur unnið 38 leiki og tapað 20 í 66 leikjum við stjórnvölinn.

Talið var að hann væri efstur á blaði hjá Aston Villa sem leitar nú að nýjum knattspyrnustjóra en nú er ljóst að svo er ekki.