Tvö mörk Everton í uppbótartíma tryggðu 3-3 jafntefli við United

Everton náði jafntefli á móti Manchester United með ótrúlegum hætti en liðið skoraði tvö mörk í uppbótartíma þegar stefndi í ekkert annað en öruggan sigur Manchester United á Goodison Park í hádegisleiknum í enska boltanum. Mikel Arteta og Tim Cahill skoruðu mörkin tvö fyrir Everton á innan við mínútu.

Manchester United hafði farið á toppinn með sigri í leiknum en í öðrum útileiknum í röð glutraði liðið niður forustu á lokamínútunum en það gerðist líka í 2-2 jafntefli við Fulham á dögunum.

Everton byrjaði leikinn mun betur og áttu fyrsta hálftímann en þeir gátu þakkað fyrir að staðan var ennþá markalaus þegar Steven Pienaar kom þeim í 1-0 eftir frábæra skyndisókn á 39. mínútu.

Tim Howard, markvörður Everton, hafði þá varið nokkrum sinnum frábærlega frá leikmönnum Manchester United þar á meðal frá bæði Paul Scholes og Ryan Giggs.

Mark Eveton kom eftir klaufalega varnartilþrif frá Patrice Evra en misheppnuð hjólahestaspyrna hans þýddi að Mikel Arteta slapp einn í gegn. Edwin van der Sar varði frá Spánverjanum en Leon Osman náði frákastinu og sendi hann á Steven Pienaar sem skoraði auðveldlega.

Það tók Manchester United aðeins fjórar mínútur að jafna en Darren Fletcher skoraði þá af stuttu færi eftir flott fyrirgjöf Nani frá hægri. Manchester United var þá búið að taka öll völd á vellinum.

United hélt áfram uppteknum hætti í byrjun seinni hálfleiks og Nemanja Vidic kom liðinu í 2-1 með flottum skalla eftir fyrirgjöf frá Nani en markið kom eftir að Everton-menn hreinsuðu frá eftir hornspyrnu.

Dimitar Berbatov kom United síðan í 3-1 á 66. mínútu eftir að hafa sloppið í gegn eftir frábæra langa sendingu frá Paul Scholes. Berbatov skoraði þarna sitt þriðja deildarmark á tímabilinu og virtist vera að tryggja United þrjú stig. Annað kom þó á daginn.

Tim Cahill gaf Everton von þegar 40 sekúndur voru komnar fram í uppbótartíma þegar hann skoraði glæsilegt skallamark eftir fyrirgjöf frá Leighton Baines og í næstu sókn skallaði Cahill aðra fyrirgjöf frá Baines fyrir fætur Mikel Arteta sem tryggði Everton jafntefli. Ótrúlegur endakafli á frábærum fótboltaleik.