Didier Drogba tryggði Chelsea enska bikarinn og sögulega tvennu

Didier Drogba skoraði eina markið í 1-0 sigri Chelsea á Portsmouth í viðburðarríkum úrslitaleik ensku bikarkeppninnar á Wembley í dag. Markið skoraði Drogba beint úr aukaspyrnu á 58. mínútu og aðeins þremur mínútum eftir að Peter Cech varði víti frá Portsmouth manninum Kevin Prince-Boateng .

Chelsea er þar með tvöfaldur meistari í fyrsta sinn í sögu félagsins en þetta var í fyrsta sinn í átta ár sem lið vinnur bæði enska meistaratitilinn og ensku bikarkeppnina á sama tímabili. Arsenal hafði gert það síðast árið 2002 og þá var Ashley Cole, núverandi leikmaður Chelsea, í liði Arsenal.

Chelsea-liðið átti fimm skot í tréverkið í fyrri hálfleik en inn vildi boltinn ekki. Besta færið fékk Salomon Kalou þegar hann skaut í slánna úr markteignum fyrir framan opið mark. Didier Drogba átti einnig frábæra aukaspyrnu sem David James varði slánna og niður á marklínuna.

Kevin Prince-Boateng fékk kjörið tækifæri til að koma Portsmouth í 1-0 á 55. mínútu en hann lét Peter Cech verja frá sér vítaspyrnu sem Aruna Dindane fékk eftir brot hjá Juliano Belletti.

Didier Drogba kom Chelsea í 1-0 aðeins þremur mínútum síðar þegar hann skoraði beint úr aukaspyrnu af rúmlega 20 metra færi en skotið hans fór í stöngina og inn.

Frank Lampard fékk möguleika til að innsigla sigurinn á 88. mínútu en hann skaut þá framhjá úr vítaspyrnu sem hann fékk sjálfur.

Ashley Cole, leikmaður Chelsea setti nýtt met með því að verða bikarmeistari í sjötta sinn á ferlinum en enginn hefur oftar unnið elstu bikarkeppni í heimi. Cole vann þrisvar  bikarinn með Arsenal (2002, 2003 og 2005) og var nú að vinna hann í þriðja sinn með Chelsea (2007, 2009 og 2010).