Segja Helguvík fara á fullt í sumar

Þau grindin séu komin á fyrstu kerskálana hafa framkvæmdir í Helguvík í raun verið í hægagangi allt frá því þær hófust haustið 2008. Aðeins um fimmtíu manns starfa að smíðinni um þessar mundir.

Hvort sem mönnum líkar það betur eða verr þá byggja áætlanir um endurreisnina á því að það takist að koma framkvæmdum þar á fulla ferð. Aðalforstjóri Century Aluminum lýsti því yfir í dag að hann tryði því að framkvæmdir færu á fullt um mitt ár. En er það raunhæft?

Norðurál hefur gott sem tryggt sér fjármögnun en framvindan ræðst nú af íslensku orkufyrirtækjunum. HS Orka vinnur að því að afla virkjanaleyfis til stækkunar Reykjanesvirkjunar og þarf síðan að tryggja fjármögnun.

Alexander Guðmundsson, stjórnarformaður HS Orku, segir þetta allt saman í réttum farvegi. Mál taki þó lengri tíma en þau gerðu fyrir einhverjum misserum, en þetta sé allt saman að mjakast í rétta átt, og telur raunhæft að alvörustartið verði um mitt ár.

Sveitarfélögin á Suðurnesjum eiga mikið undir. Árni Sigfússon, bæjarstjóri Reykjanesbæjar, kveðst hafa unnið að undirbúningi þessa verkefnis í fimm ár og fylgst náið með hverju skrefi. Hann trúi því sannarlega að það verði komið af stað á miðju ári.

Ásmundur Friðriksson, bæjarstjóri í Garði, segir að það yrði algert reiðarslag, ekki bara fyrir þetta svæði, heldur allt landið, ef enn eitt skiptið ætti að segja fólkinu að þessar framkvæmdir væru að stöðvast vegna þess að við sjálf værum að stöðva þær. Eina sem þetta land þarfnaðist nú væri að afla gjaldeyris og þessar verksmiðjur biðu eftir því.