Arshavin: Pressan mun eyðileggja HM fyrir Englandi

Andrei Arshavin, rússneski landsliðsmaðurinn hjá Arsenal, hefur varað ensku blaðamennina við því að þeir geti hreinlega eyðilagt möguleika enska landsliðsins á HM í Suður-Afríku í sumar.

Eiginkonur og kærustur leikmanna stálu senunni á HM fyrir fjórum árum og nú hafa vandamál leikmanna utan vallar verið allsráðandi á síðum ensku blaðanna eins og í kringum framhjáhald John Terry.

„Auðvitað er það eðlilegt að venjulegt fólk hafi áhuga á þessum málum en í Englandi eru menn að eyðileggja enska landsliðið með því að kafa alltof djúpt í einkalíf manna," sagði Arshavin í viðtalið við The Times.

„Þetta bitnar á liðinu. Það vilja allir að Englandi verði heimsmeistari en þá geta menn ekki verið að brjóta liðið niður á sama tíma. Það verður að leyfa landsliðsmönnum að vera mannlegir," sagði Arshavin.