Mikið álag á húð- og kynsjúkdómadeild

Álagstoppur hefur verið á húð- og kynsjúkdómadeild Landspítala – háskólasjúkrahúss að undanförnu og allnokkur bið eftir að komast að.

„Á deildinni háttar þannig til að bið eftir viðtali getur verið lengri eða skemmri eftir aðstæðum hjá okkur,“ segir Jón Hjaltalín Ólafsson, yfirlæknir á deildinni. „Stundum getur verið löng bið, stundum er engin bið. Að undanförnu hefur fólk þurft að bíða allnokkuð til að komast í viðtal.“

Jón segir mikið álag hafa verið á starfsfólki deildarinnar að undanförnu.

„Við höfum verið með heldur færri lækna en áður,“ útskýrir hann. „Staðan er því sérstaklega erfið núna. Það getur verið tveggja vikna bið eftir að komast að hjá lækni og vika eftir að fá tíma hjá hjúkrunarfræðingi. Venjulega leiðin er sú, að séu engin einkenni til staðar fær fólk tíma hjá hjúkrunarfræðingi. Hann tekur sýni hjá viðkomandi. Reynist eitthvað vera að vísa hjúkrunarfræðingarnir á læknana, þar sem viðkomandi fær tíma í meðferð.

Ef sjúklingar lýsa einkennum þegar tími er pantaður, svo sem kviðverkjum, sviða eða að þeim líður mjög illa er auðvitað reynt að sinna þeim fyrr og þeir teknir aukalega inn ef hægt er. Svo getur fólk alltaf leitað á heilsugæsluna, til húð- og kynsjúkdómalækna eða kvensjúkdómalækna ef það fær ekki þá þjónustu sem það óskar eftir hjá okkur.“

Jón segir þetta fyrirkomulag, að einkennalausir fái fyrst viðtal hjá hjúkrunarfræðingi haft á til þess að spara læknatímana. Hins vegar séu hjúkrunarfræðingarnir einnig í erfiðleikum nú þar sem verið sé að skera alls staðar niður, ekki síst hjá húð- og kynsjúkdómadeild þar sem deildin hefur meðal annars þurft að sjá á eftir reyndum hjúkrunarfræðingi og ekki fengið að ráða annan í staðinn.

„Það er erfiður tími hjá okkur núna,“ segir Jón. „Læknar hafa þurft að fara í frí, það hafa verið veikindi og svo mætti áfram telja.“

Jón telur að ástandið muni lagast eftir nokkrar vikur.

Spurður hvort komið hafi til þess að þurft hafi að vísa fólki á einkastofur úti í bæ segir Jón ekki mikið um það. „En auðvitað kemur það fyrir ef við ráðum ekki við tilfellið hér á deildinni. Það er ýmislegt sem við getum ekki gert hér. Við höfum til dæmis ekki tæki né mannafla til að sinna erfiðari meðferðum gegn sumum kynsjúkdómum. Viðkomandi einstaklingum er þá vísað á stofur úti í bæ, ekki síst til kvensjúkdómalækna og kynsjúkdómalækna.“jss@frettabladid.is