Skattahækkanirnar hafa skaðað atvinnulífið

Skattahækkanir ríkisstjórnarinnar hafa skaða atvinnulífið að mati Bjarna Benediktssonar, formanns Sjálfstæðisflokksins. Umsvif í hagkerfinu í upphaf þessa árs eru minni en áætlanir gerðu ráð fyrir að sögn fjármálaráðherra.

Bjarni Benediktsson, formaður Sjálfstæðisflokks, spurði fjármálaráðherra meðal annars um stöðuna í efnahagsmálum í fyrirspurnartíma á Alþingi í morgun. Hann gagnrýndi ríkisstjórnina fyrir metnaðarleysi í niðurskurðarmálum og fyrir að hafa einblínt of mikið á skattahækkanir til að stoppa í fjárlagagatið.

„Við í stjórnarandstöðunni höfum boðist til að eiga samráð við stjórnarflokkana um það hvernig staðið verði af þessari miklu aðlögunarþörf. Hvernig staðið verði að samdrætti í útgjöldum ríkisins. Ég veit eins og allir hinir í þessum sal að þar stöndum við frammi fyrir erfiðum ákvörðunum en það má ekki bíða með að hefja þá undirbúningsvinnu vegna þess að það hleypur á tugum milljarða sem við þurfum að lækka ríkisútgjöldin," sagði Bjarni.

Fram kom í máli Steingríms J. Sigfússonar, fjármálaráðherra, að niðurskurður og sparnaður hjá ríkinu á þessu ári sé áætlaður um 43 til 45 milljarðar. Hann vísaði því á bug að aðgerðir hafi einungis snúist um skattahækkanir. Þá kom einnig fram í máli ráðherra að umsvif í hagkerfinu í upphafi árs hafi verið minni en áætlanir gerðu ráð fyrir.

„Velta og þróun á síðustu mánuðum ársins 2009 var jákvæðari en ég átti von á en það hefur hægt á hlutunum aftur á fyrstu vikum ársins og velta er minni. Það bendir til þess að árið fari að minnsta kosti hægar af stað en við mátti búast," sagði Steingrímur.

„En árið fer hægar af stað en ráð var fyrirgert segir fjármálaráðherra. Ég spyr mig að því hvort það geti ekki verið að hinar miklu skattahækkanir sem komu til framkvæmda um áramótin séu einmitt að valda þessu," sagði Bjarni.