Rooney vill gerast þjálfari eftir að ferlinum lýkur

Wayne Rooney segir að hann vilji snúa sér að þjálfun þegar að ferli hans sem leikmaður lýkur. Þetta sagði hann þegar hann tók við verðlaunum samtaka fótboltablaðamanna á Englandi í kvöld.

Rooney er 24 ára gamall og á því mörg ár eftir í boltanum sem leikmaður.

„Ég myndi gjarnan snúa mér svo að þjálfun. Ég byrjaði níu ára gamall hjá Everton og fótboltinn hefur spilað mjög stórt hlutverk í mínu lífi," sagði Rooney í kvöld.

„Ég vil því halda áfram að sinna knattspyrnunni eftir að ég hætti að spila. Ég byrjaði að taka þjálfaranámskeið á þessu ári en náði ekki að sinna því eins vel og ég hefði kosið. En vonandi get ég haldið áfram á næsta ári."

„Ég elska fótbolta og á erfitt með að ímynda mér að ég eigi eftir að reka veitingahús í framtíðinni - ég vil halda áfram í boltanum," sagði hann.

„En ég er aðeins 24 ára gamall og vonandi enn mín bestu ár eftir."