Viktor Unnar aftur til Breiðabliks

Viktor Unnar Illugason hefur ákveðið að ganga aftur í raðir Breiðabliks, uppeldisfélags síns.

Viktor fór frá Blikum árið 2006 og þá til Reading á Englandi, aðeins sextán ára gamall. Þar var hann í þrjú ár en gekk svo til liðs við Val í fyrra.

Hann fór svo lánaður frá Val til Selfoss á miðju tímabili í sumar en alls skoraði hann fimm mörk í átján leikjum með þessum félögum í Pepsi-deildinni í sumar.

Liðið fékk á dögunum Arnar Már Björgvinsson frá Stjörnunni en hefur misst Alfreð Finnbogason, leikmann ársins í deildinni, í atvinnumennsku til Lokeren í Belgíu.

Frá þessu var greint á vefsíðunni blikar.is í dag.