„Þyrftu að breyta nafninu í fávitafélagið Nýtt Ísland“

„Mín fyrstu viðbrögð þegar ég sá þetta voru þau að samtökin þyrftu að breyta nafninu í fávitafélagið Nýtt Ísland," segir Teitur Atlason, nemi í Alþjóðaviðskiptum í Gautaborg en nafn hans og staða hefur á sérkennilegan hátt slæðst inn í stefnumál samtakanna Nýtt Ísland.

Undir liðnum efnahagsmál á heimasíðu þeirra má finna fjölmörg stefnumál samtakanna Nýs Íslands. Meðal annars vilja þeir afnema alla styrki til listamanna. Þá vilja þeir einnig skikka þá sem þiggja atvinnuleysisbætur í 30 prósent vinnu fyrir hið opinbera eftir að þeir hafi verið á atvinnuleysisskrá í þrjá mánuði.

Svo segir á stefnuskránni: „Jákvætt verði tekið í að veita Teiti Atlasyni frekari námsstyrk við nám í Gautaborg."

„Maður fer að hugsa með sér hvað þeir eru eiginlega að segja. Er þetta skot á mig sem námsmann? Eru þeir að gefa í skyn að allir námsmenn séu afætur?" spyr Teitur sem er undrandi á því að vera kominn á stefnuskrá samtakanna en sjálfur hefur hann gagnrýnt Nýtt Ísland harkalega á bloggi sínu á dv.is undanfarnar vikur.

„Þetta sýnir bara hverskonar samtök þetta eru, þetta eru í raun bara vitleysingar," segir Teitur sem er undrandi að samtökin skuli svara gagnrýni í bloggheimum með þessum hætti.

„Og það versta við málið er að þetta er ekki einu sinni fyndið. Ég er þegar búinn að vara við fasískum tilhneigingum þessa félags en þeir fara inn á þennan reiðimarkað og hræra í fólki. Það er stórhættulegt og ekkert fyndið við það," segir Teitur sem þykir full ástæða til þess að vara við samtökunum sem hingað til hafa verið í fréttum vegna mótmæla þar sem stökkbreyttum myntkörfulánum er harðlega mótmælt.

Teitur segir ábyrgð fjölmiðla mikla þar sem samtökunum hafi verið gefin of mikil athygli að hans mati og það gagnrýnislaust. Þá heldur hann því fram að fjórir einstaklingar úr stjórn VR séu í félaginu.

Það rímar við ályktun stjórnar VR í lok janúar en þar harmaði meirihluti stjórnarinnar að stjórnarmenn innan VR tengdust samtökunum sem meðal annars hafa það á stefnuskrá sinni „að leggja niður Alþingi Íslendinga. Samtök þessi, Nýtt Ísland, voru stofnuð í tengslum við kosningar í VR á síðasta ári en beina nú kröftum sínum að því að brjóta félagið niður," sagði í ályktuninni.

Þá gagnrýnir Teitur einnig Borgarahreyfinguna fyrir að leggja lag sitt við Nýtt Ísland.