Með hnífinn í bakinu eftir Sophiu Hansen

Það er skelfilegt að fá hnífinn í bakið eftir á annan tug ára í baráttu, segir Sigurður Pétur Harðarson um samskipti sín við Sophiu Hansen. Í morgun fór fram aðalmeðferð í fjársvikamáli gegn Sophiu þar sem Rúna dóttir hennar bar meðal annars vitni.

Sigurður Pétur hefur aðstoðað Sophiu Hansen í um tuttugu ár og var meðal annars umsjónarmaður söfnunarinnar, Börnin heim, en Sophia stóð þá í forræðisdeilu við þáverandi eiginmann sinn Halim Al.

Það var síðan fyrir rétt tæpu ári sem Sophia var dæmd til þess að greiða Sigurði rétt tæpar 20 milljónir króna vegna peningaláns sem hann hafði veitt henni.

Árið 2007 kærði Sophia hinsvegar Sigurð fyrir að falsa undirskriftir á samninga sem snéru meðal annars að sölu á fasteign sem hún hafði fengið í arf eftir móður sína.

Ásakanirnir voru litnar alvarlegum augum og voru meðal annars rithandarsérfræðingar frá Svíþjóð fengnir til að rannsaka rithöndina á skjölunum. Í ljós kom að yfirgnæfandi líkur eru á að hinar véfengdu undirskriftir séu undirskriftir Sophiu, en ekki Sigurðar Péturs. Málið var því látið niður falla.

Ríkissaksóknari hinsvegar út ákæru á hendur Sophiu vegna ásakanna, og fór fram aðalmeðferð í því máli í morgun. Sophia neitaði því staðfastlega að eiga umræddar undirskriftir, en dóttir hennar Rúna Hansen, var meðal annars vottur á skjölum sem voru undirrituð á hótelherbergi í Tryklandi árið 2005.

Rúna, sem í dag er 27 ára gömul tveggja barna móðir, bar vitni í gengum síma í Héraðsdómi í morgun. Þar sagðist hún ekki eiga umræddar undirskriftir og hún hefði aldrei hitt Sigurð Pétur árið 2005. Þetta segir Sigurður ekki rétt.

Sigurður segist hafa verið í sambandi við Rúnu í gegnum árin. Hann hafi til að mynda sent henni jóla og afmæliskveðjur með sms skilaboðum auk þess sem Rúna og eiginmaður hennar séu á msn hjá sér.

Hann hefur undir höndum bréfsnifsi frá umræddu hóteli þar sem Rúna skrifar tyrkneska nafn sitt í þrígang, þær undirskriftir eru sláandi líkar rithandarsýni sem hún sendi til Íslands árið 2008, en fréttamaður fékk að sjá undirskriftirnar í dag.

Framburður Sophiu í morgun var ótrúverðugur. Hún véfengdi meðal annars orð Ragnar H. Hall hæstaréttardómara, sagðist aldrei hafa séð fyrrum lögregluþjón sem var vitni að einni af undirskriftunum.

Málið hefur hinsvegar tekið á Sigurð Pétur, sem segist hafa fórnað öllu fyrir þessa baráttu.

Ákæruvaldið fer fram á að Sophia verði dæmd í allt að sex mánaða fangelsi fyrir ásakanirnar á hendur Sigurði.