The Sun og Mirror fjalla um fögnuð Stjörnumanna

Fögnuður Stjörnumanna eftir sigurmarkið gegn Fylki um helgina hefur vakið athygli á heimsvísu.

Halldór Orri Björnsson skoraði úr vítaspyrnu í lok leiksins og þóttist svo veiða Jóhann Laxdal með veiðistöng og draga hann að landi eins og áður hefur verið greint frá.

Fjölmiðlar á Norðurlöndunum hafa sýnt myndband af þessu og ensku götublöðin The Sun og Mirror fjalla einnig um málið á heimasíðum sínum í dag.

Mirror tekur saman tíu flottustu fagnaðarlæti sögunnar og eru tilburðir Stjörnunnar þar efst á lista.

Í gær var sett myndband inn á Youtube sem hefur verið skoðað um 60 þúsund sinnum þegar þetta er skrifað.